धरानका मेयर हर्क साम्पाङले दिए तोडफोड गर्ने एमाले नेताविरुद्ध जाहेरी
  • मूलधार

सुनसरी । धरान उपमहानगरपालिकाको नगर प्रमुख (मेयर)को कार्यकक्षमा तोडफोड र गालीगलौजको विषयलाई लिएर नगर प्रमुख हर्कराज राई (साम्पाङ)ले दुई जनाविरुद्ध प्रहरीमा जाहेरी दिएका छन् ।

आइतबार बराह बचत तथा ऋण सहकारीबाट ठगीएका पीडित संघर्ष समितिले नगर प्रमुख साम्पाङविरुद्ध नाराबाजी गर्दै कार्यकक्षको सिसा समेत तोडफोड गरेका थिए । वार्ताको तयारी भइरहेका बेला आक्रोशितहरुले मेयरको कार्यकक्षमा तोडफोड गरेको बताइएको छ ।

साम्पाङले सोमबार इलाका प्रहरी कार्यालय धरानमा जाहेरी दिएका छन् । इलाका प्रहरी कार्यालय धरानका डिएसपी बुद्ध श्रेष्ठले नगर प्रमुख साम्पाङले जाहेरी दिएको जानकारी दिए ।

बराह पीडित संघर्ष समितिका संयोजक खगेन्द्र नेपाली र समितिका प्रवक्ता प्रदिप बाँस्तोलाविरुद्ध जाहेरी दिएको जनाइएको छ । उनीहरुलाई पक्राउ गर्नका लागि अदालतबाट पूर्जी लिने तयारी भइरहेको प्रहरीले जनाएको छ । बाँस्तो एमाले नेता हुन् ।

हुलहुज्जत र अभद्र व्यवहारको जाहेरी आएको र प्रक्रिया अगाडि बढाउन निर्देशन दिइएको जिल्ला प्रहरी कार्यालय सुनसरीका एसपी सञ्जयसिंह थापाले जानकारी दिए ।

आइतबार छानबिन समितिसँगको वार्तामा बस्ने क्रममा मेयर साम्पाङले ‘मलाई सोधेर पैसा राख्न दिएको हो ?’ भन्ने अभिव्यक्ति दिएको भन्दै पीडितहरुले नगर प्रमुख विरुद्ध नाराबाजी गर्दै उनको कार्यकक्षको सिसा समेत फुटाई दिएका थिए ।

यता नगर प्रमुख साम्पाङले भने ’यो राजनीतिक षड्यन्त्र भएकाले प्रहरीमा उजुरी दिएको छु, यो व्यक्तिमाथिको आक्रमण नभई नगर र स्थानीय सरकार माथिकै आक्रमण हो ।’

  • August 2, 2022 प्रकाशित
  • सम्बन्धित